Thailand: 100 tausan pipal i holim protes mas tede
Updated
Wanpla bikpla na strongpla politikal mas nau iwok long go hed long Bangkok na oli ting samting olsem 100-tausan ol pipal oa protestors ibin kamap long askim strong olsem gavman imas pinis nau long lukautim kantri.
ABC niusman Conor Duffy istap nau long Bangkok na emi tok, traipla san tru na Bangkok sisit i hot tru, tasol planti tausan ol pipal husat i putim ol retpla siot i pulap nating long ol bikrot raonim Bangkok siti.
Ol sapota blong man husat ibin lida blong Thailand bifo, na man husat oli bin rausim em pinis, olpla prime minister Thaksin Shinawatra, em oli save kolim ol long Reds, i luk olsem namba blong ol istap klostu long 100-tausan, na despla namba iwok long surik igo antap moa iet.
Ol lida blong redshirts iwok long askim strong olsem Praim Minista imas lusim wok blong en na oli wok singaut olsem, "Abhisit, get out!" .
Singaut blong ol despla pipal iwok long bagarapim iau blong planti pipal long wonem oli wok long singaut bikpla na strong tru.
Bikpla lida tru blong ol redshirts iwok long givim ol toktok igo long ol pipal husat istap long despla protes mas, na emi tokim gavman olsem oli gat wanpla dei tasol istap long lusim wok blong lukautim kantri.
