AUST: Ol sinia politisan igo long planim bodi blong soljia
Updated
Ol sinia politisan blong Australia ibin lusim pastem ol heve blong wok politik na oli bin go stap long wanpla lotu blong planim bodi blong wanpla Australian soljia husat ibin dai long Afghanistan tupla wik igo pinis.
ABC niusmeri long Brisbane, Maria Hatzakis i ripot olsem planti pipal tru ibin pulumapim St Peter Chanel haus lotu long liklik ples em oli kolim long The Gap long brisbane iet blong tok gudbai na tingim laif blong despla soljia, Private Grant Kirby.
Emi bin dai bihaen long wanpla bom pairap long Baluchi Valley long Afghanistan taem emi bin wok long mekim wanpla patrol tupla wik igo pinis.
Australian Praim Minista, Julia Gillard, oposisan lida Tony Abbott na difens minista, John Faulkner ibin stap namel long ol pipal husat ibin bung na stap long lotu blong Private Grant Kirby.
