Aus: Leba Pati nau i fomim niupla gavman
Updated
Australia Leba pati, em i bin ronim gavman ikam inap long eleksen, i ken nau fomim niupla Federal Gavman.
Leba i ken fomim gavman nau bihain long em i kisim sapot long tupla long tripla indipendent memba husat pipal i bin wok long wetim tripla long stretim tingting long husat bai oli sapotim.
17 de bihain long federal eleksen, Julia Gillard nau i win na bai stap Praim Minista yet.
Tupla independent memba, Rob Oakshott na Tony Windsor i bin stretim tingting long sapotim Leba Pati.
Tupla i kisim wanem samting tupla i bin wok long askim long en ikam long Leba na Koalisen - na displa em long kamapim sampla senis long wei paliment i mekim wok blong en, promis bai wanpla bikpla miting i mas kamap blong lukluk long takis na wanpla referendum i mas kamap blong putim luksave long ol asples blong Australia, ol aboriginal, insait long mama-loa blong kantri.
Tupla man wantem i promis long sapotim Leba sapos wanpla mosen nogat bilip i kamap long en na tu, long noken blokim supply.
Mr Oakshott i tok em i ting Leba bai opim tingting blong en long ol displa niupla aidia blong ol indipendent.
Nambatri indipendent, Bob Katter i bin givim sapot blong em long Tony Abbott, na displa i mekim fainel vout i stap olsem - 76 blong Leba na 74 blong Koalisen.
